- २५ आश्विन २०८३, आईतवार / Oct 11, 2026
चितवन, १२ जेठ । चितवनका केही दुग्ध उत्पादक डेरीहरुले दूध नउठाउने चेतावनी दिएका छन् । भुक्तानीका लागि दबाब दिँदा दुग्ध उत्पादक सहकारी संस्थाहरुले दुध नउठाउने चेतावनी दिएका हुन् ।
चितवन जिल्ला दुग्ध उत्पादक सहकारी सङ्घका अध्यक्ष किशोर बगालेका अनुसार अहिले भुक्तानी माग गरेका सहकारीहरुबाट दूध उठ्न कठिन भएको छ । चितवनमा उत्पादित दूध सरकारको स्वामित्वमा रहेको दुग्ध विकास संस्थान डीडीसी र निजी कम्पनीले लैजाने गरेका छन् ।
उहाँका अनुसार जिल्लामा रहेका दुग्ध उत्पादक सहकारीहरुले विभिन्न डेरीहरुबाट ८० करोड रुपैयाँभन्दा धेरैको भुक्तानी पाउन बाँकी रहेको छ । यो रकममध्ये डीडीसीको ३५ करोडभन्दा धेरै र अरू रकम निजी डेरीहरुको रहेको हो ।
अध्यक्ष बगालेका अनुसार जिल्लाबाट ४० भन्दा बढी डेरीले दूध लैजाने गरेका छन् । ती डेरीहरुले भुक्तानी माग्दा नियमित लैजाने दूधबाट कटौती गरेर थोरै लैजान थालेको उहाँले जानकारी दिनुभयो । डेरीहरुबाट गएको पुस १ गतेदेखिको भुक्तानी लिन बाँकी छ ।
यस्तै अवस्था आए दुग्ध उत्पादक किसान आन्दोलनमा आउन बाध्य हुने उहाँको भनाइ छ । चितवनबाट दैनिक एक लाख ५१ हजार लिटर दूध बाहिर जिल्ला जाने गरेको सङ्घले जनाएको छ । जसमध्ये ३५ हजार लिटर दूध डिडिसिले लाने गरेको छ ।
अहिले चितवनमा दैनिक तीन लाख लिटरभन्दा धेरै दूध उत्पादन हुँदै आएको छ । किसानको भुक्तानी दिन ढिला गरे पछि सङ्घले स्थानीय प्रशासनलाई भुक्तानीका लागि सहजीकरण गर्न आग्रह गरेका छन् । रासस
