- २९ असार २०८३, सोमबार / Jul 13, 2026
एजेन्सी, १२ जेठ । अमेरिका र युरोपेली युनियनबीच चलिरहेको व्यापार वार्तालाई निरन्तरता दिन अमेरिकाले समयसीमा थप गरेको छ। अमेरिकी राष्ट्रपति डोनाल्ड ट्रम्पले युरोपेली युनियनसँगको व्यापार सम्झौताको लागि जुलाई ९ सम्मको समय दिएका हुन्।
युरोपेली युनियनकी प्रमुख उरुस्ला भान डेर लेयनले वार्ताका लागि तयारी देखाएपछि राष्ट्रपति ट्रम्पले समय थप गर्न सहमति जनाएका हुन्। बीबीसीको रिपोर्ट अनुसार, ट्रम्पले पहिले नै वार्ता नभएमा युरोपेली सामानहरूमा ५० प्रतिशत भन्सार कर लगाउने चेतावनी दिएका थिए।
यसअघि उनले युरोपेली युनियनबाट आयात हुने वस्तुहरूमा २० प्रतिशत कर घोषणा गरेका थिए। पछि त्यो घटाएर १० प्रतिशत गरिए पनि पछिल्लो समय फेरि ५० प्रतिशत करको सम्भावना उल्लेख गरिएको छ।
अहिले वार्ताको वातावरण सकारात्मक बनेको बताउँदै युनियनकी प्रमुख लेयनले अमेरिका र युरोपेली युनियनबीच समझदारी हुने आशा व्यक्त गरेकी छन्। सम्झौता नभएमा दुई ठूला अर्थतन्त्रबीचको व्यापारिक तनाव अझ चर्किने विश्लेषण भइरहेको छ।
