मापसे गरेकालाई सडकमा उभ्याउने कुन कानुनमा छः कांग्रेस

काठमाडौं । नेपाली कांग्रेसका सांसद रामहरि खतिवडाले ट्राफिक कारबाहीमा परेकाहरूलाई सडकमा स्वयंसेवा गर्न लगाउने गृह मन्त्रालयको निर्णयप्रति आपत्ति जनाएका छन् । आजको प्रतिनिधिसभा बैठकमा आकस्मिक समयमा बोल्दै सांसद खतिवडाले हुकुमी पद्धतिमा नभई मुलुक कानुनी मान्यतामा चल्नुपर्ने बताए ।

मुलुकलाई कानुनी शासन अनुसार चलाउनुपर्ने भन्दै कानुनबिना त्यसरी मानिसलाई सडकमा ल्याउनु नहुने सांसद खतिवडाले बताए। ‘गणतन्त्र स्थापना भएको अवसरमा माननीय उपप्रधानमन्त्रीको ट्वीट मा महिनावारि भएका ट्राफिक महिलालाई ४ दिन छुट्टी दिने व्यवस्था गर्नुभएछ । कानुन बनाएर चल्दा यो राम्रो हो तर यसलाई हुकुमी शासनबाट चलाइयो । कुनै पनि काम गर्दा कानुन बनाएर चल्नुपर्छ । मापसे गरेकालाई सडकमा उभ्याउने कुन कानुनमा छ । त्यसैले हामी कुनै पनि श्रम शोषण गर्न पाइदैन । सरकारले यो विषयमा रुलिङ्ग गर्नुपर्छ भन्ने मेरो धारणा छ ।’ सांसद खतिवडाले भने