- २० श्रावण २०८३, बुधबार / Aug 5, 2026
काठमाडौं, ४ बैशाख । नेपाली कांग्रेसको आधिकारिकता सम्बन्धी विवादमा सर्वोच्च अदालतमा आज पनि सुनुवाइ जारी रहने भएको छ ।
न्यायाधीश शारंगा सुवेदी र नृपध्वज निरौलाको संयुक्त इजलासमा बिहीबारदेखि सुरु भएको सुनुवाइ नसकिएपछि ‘हेर्दाहेर्दै’मा राखिएको थियो । आज उक्त मुद्दामा निरन्तर बहस हुने र सम्भवतः आजै आदेश आउने अपेक्षा गरिएको छ ।
तत्कालीन सभापति शेरबहादुर देउवा र कार्यवाहक सभापति पूर्णबहादुर खड्काले विशेष महाधिवेशनबाट निर्वाचित सभापति गगन थापा नेतृत्वलाई आधिकारिकता दिने निर्वाचन आयोगको निर्णयविरुद्ध सर्वोच्च अदालतमा रिट दायर गरेका हुन् ।
यसबीच, मुद्दा विचाराधीन रहेकै अवस्थामा १५औँ महाधिवेशनको कार्यतालिका सार्वजनिक गरिएको भन्दै खड्काले पूरक निवेदनसमेत पेश गरेका छन् ।
देउवा पक्ष तथा निर्वाचन आयोगका तर्फबाट सरकारी वकिलको बहस सकिएको छ । आज विपक्षीका रूपमा रहेका सभापति गगन थापा र उपसभापति विश्वप्रकाश शर्माका पक्षबाट प्रतिरक्षा बहस हुनेछ ।
त्यसपछि रिट निवेदक पक्षका कानुन व्यवसायीले जवाफी बहस गरेपछि इजलासले आदेश दिने सम्भावना रहेको बताइएको छ ।
