- २० श्रावण २०८३, बुधबार / Aug 5, 2026
सुनसरी, ४ बैशाख । सुनसरीको बर्जु गाउँपालिका–६ बर्जुताल क्षेत्रबाट गैडाको खागजस्तो देखिने वस्तुसहित चार जनालाई सशस्त्र प्रहरीले पक्राउ गरेको छ ।
विशेष सूचनाको आधारमा अवैध रूपमा खागको कारोबार भइरहेको खबर पाएपछि सशस्त्र प्रहरी बल नेपालको बराह बाहिनी मुख्यालय सुनसरीबाट खटिएको टोलीले उनीहरूलाई नियन्त्रणमा लिएको हो ।
पक्राउ पर्नेहरूमा बर्जु गाउँपालिका–६ चिमडीका ३९ वर्षीय राजेशकुमार उराउ, ३१ वर्षीय जीवन चौधरी, बर्जु गाउँपालिका–५ अमाहीबेलाका ३३ वर्षीय रविनकुमार यादव तथा मोरङको पथरीशनिश्चरे नगरपालिका–१ निवासी ४७ वर्षीय नारायणप्रसाद घिमिरे रहेका छन् । उनीहरूलाई मोलमोलाइ गरिरहेको अवस्थामा नियन्त्रणमा लिइएको सशस्त्र प्रहरी नायब महानिरीक्षक विष्णुप्रसाद भट्टले जानकारी दिए ।
उनीहरूको साथबाट गैडाको खागजस्तो देखिने वस्तु, दुई वटा मोटरसाइकल, चार थान मोबाइल सेट तथा करिब ६ हजार रुपैयाँ नगद बरामद गरिएको छ ।
पक्राउ परेकाहरूलाई थप अनुसन्धानका लागि जिल्ला वन कार्यालय इनरुवा, सुनसरीमा बुझाइएको सशस्त्र प्रहरीले जनाएको छ ।
