चार हजार पाँच सय हेक्टर वन सखाप

रामेछाप । आठवटा स्थानीय तहका एक सय ५५ स्थानमा डढेलोबाट चार हजार पाँच सय हेक्टर वन सखाप भएको छ । दोरम्बा शैलुङ गाउँपालिकामा सवैभन्दा बढी नष्ट भएको डिभिजन वन कार्यालयले जनाएको छ ।

अहिलेसम्म भएका आगलागीबाट एक सय ५५ सामुदायिक र कबुलियत वनमा क्षति भएको वन अधिकृत ओमसागर भण्डारीले बताए । धेरै वन क्षेत्रमा आगो लाग्दा वन्यजन्तु प्रभावित भएका छन् । यो वर्ष डढेलोमा परी दुईजनाले ज्यान गुमाइसकेका छन् ।

स्थानीय प्रशासनले वनमा आगो नलागाउन तथा त्यसबाट हुने क्षतिबारे सर्वसाधारणलाई अवगत गराएको छ । वनमा आयो लगाएमा फौजदारी अभियोगअन्तर्गत कारबाही हुने वन र वन्यजन्तु संरक्षणतर्फ सचेत हुन आग्रह गरेको जनाएको छ ।