भाईटीकाको दिन दाङको सौडियारमा १२ जना जुवातास खेल्दै गर्दा पक्राउ

काठमाण्डौ, ७ कार्तिक । दाङको सौडियारमा भाईटीकाको दिन तास खेल्दै गरेका १२ जना व्यक्ति पक्राउ परेका छन्। जिल्ला प्रहरी कार्यालय दाङका अनुसार, घोराही उपमहानगरपालिका–७ सौडियारमा जुवातास खेलिरहेको सूचनाका आधारमा प्रहरीले छापा मारी उनीहरूलाई नियन्त्रणमा लिएको हो।

प्रहरीले दिनेश चौधरीको घरमा पैसाको हारजित हुने गरी तास खेलिरहेको अवस्थामा समूहलाई समातेको जनाएको छ। घटनास्थलबाट एक लाख ३२ हजार रुपैयाँ नगद र १४ गड्डी तास बरामद गरिएको प्रहरीको भनाइ छ।

जुवाको खालबाट बरामद सामग्रीसहित १२ जनालाई नियन्त्रणमा लिएर आवश्यक अनुसन्धान अघि बढाइएको जिल्ला प्रहरी कार्यालय दाङका प्रहरी प्रवक्ता डीएसपी चक्रबहादुर शाहले जानकारी दिनुभयो।

प्रहरीका अनुसार, तिहार जस्तो पर्वको अवसरमा जुवातास नियन्त्रणका लागि विशेष अभियान सञ्चालन गरिएको थियो।