- २८ असार २०८३, आईतवार / Jul 12, 2026
कैलाली, ७ कार्तिक । सरकारले तोकेको मूल्यमा धान बिक्री हुन नसक्दा किसानहरू सस्तोमा धान बेच्न बाध्य भएका छन् । यो अवस्थाको विरोध गर्दै कैलालीका युवा नेत्र भण्डारीले भाइटिकाको दिनदेखि जिल्ला प्रशासन कार्यालय कैलालीको गेटमा अनसन सुरु गरेका छन् । भण्डारी ‘जसको कोही छैन, त्यसको हामी छौँ’ नामक अभियानका प्रमुख हुन् ।
उनका अनुसार किसानहरूले अहिले सरकारले निर्धारण गरेको मूल्यभन्दा झन्डै एक हजारदेखि पन्ध्र सय रुपैयाँसम्म कममा धान बेच्न बाध्य छन् । सरकारले तोकेको मूल्य किसानले पाउनैपर्ने माग गर्दै उनले अनसन थालेका हुन् । सरकारले गत भदौ २६ गते मोटा धानको मूल्य प्रतिमुरी ३ हजार ४६३ रुपैयाँ ८१ पैसा र मध्यम धानको मूल्य ३ हजार ६२८ रुपैयाँ ३३ पैसा तोकेको थियो । सो अनुसार जिल्ला प्रशासन कार्यालय कैलालीले असोज ३१ गते सूचना जारी गर्दै सरकारी मूल्य कार्यान्वयन गर्न निर्देशन दिएको थियो । तर, किसानहरूले अझै पनि तोकिएको दरमा बिक्री गर्न नपाएको भण्डारीको भनाइ छ ।
भण्डारीले भने, “सरकारले तोकेको मूल्यभन्दा बढी मूल्य पाउनुपर्ने किसान अहिले त्यो मूल्य पनि पाएका छैनन् । व्यापारीले धानको मूल्य निर्धारण गर्नु गलत हो । अब किसानले आफ्नै धानको मूल्य तोक्न पाउनु पर्छ, नत्र सरकारले तोकेको मूल्य व्यापारीले दिनुपर्छ ।” उनले सस्तोमा धान बेच्न बाध्य भएका किसानलाई क्षतिपूर्ति दिनुपर्ने माग पनि गरेका छन् ।
अनसन सुरु भएपछि सुदूरपश्चिम प्रदेशका मुख्यमन्त्री कमल बहादुर शाहले प्रमुख जिल्ला अधिकारी कृष्ण प्रसाद लम्साललाई फोन गरी समस्या तत्काल समाधान गर्न निर्देशन दिएका छन् । मुख्यमन्त्रीको निर्देशनपछि जिल्ला प्रशासन कार्यालयमा किसान अगुवा, उद्योग वाणिज्य संघ र जेनजीका प्रतिनिधिहरूबीच वार्ता सुरु भएको छ । प्रशासनका अनुसार किसानका माग सम्बोधनका लागि छलफल जारी छ ।
सरकारले निर्धारण गरेको मूल्य किसानसम्म पुग्न नसक्दा कैलालीका किसानहरूमा असन्तुष्टि बढेको छ । किसान पक्षका युवा नेत्र भण्डारीको अनसनले अब प्रशासन र प्रदेश सरकारलाई मूल्य कार्यान्वयनतर्फ गम्भीर हुन बाध्य बनाएको छ ।
