- ३० आश्विन २०८३, शुक्रबार / Oct 16, 2026
काठमाडौँ, २५ असार । पश्चिम नवलपरासीको बर्दघाट नगरपालिका–४ स्थित खुर्सानी खोलानजिक सडक भासिएपछि बुधबार बिहानदेखि पूर्वपश्चिम राजमार्ग पूर्ण रूपमा अवरुद्ध भएको छ।
जिल्ला प्रहरी कार्यालयका सूचना अधिकारी प्रहरी नायव उपरीक्षक (डीएसपी) वीरदत्त पन्तका अनुसार बिहान ५ बजेतिर सडक भासिएको थियो। भासिएको ठाउँमा एक ट्रक पनि फसेपछि सडक पूर्ण अवरुद्ध भएको हो।
पूर्वतर्फ जाने सवारीसाधनहरू बर्दघाटको टीसीएन चोकमा, र पश्चिमतर्फ जाने सवारीहरू दुम्किबासमा रोकिएका छन्। सडक खुलाउने प्रयास भइरहेको भए पनि लगातारको वर्षाले काममा कठिनाइ भइरहेको डीएसपी पन्तले जानकारी दिए। ट्रक फसेको ठाउँमा वैकल्पिक बाटो बनाएर सवारीसाधन सञ्चालन गर्न प्रयास जारी छ।
नारायणगढ–बुटवल सडकखण्ड अन्तर्गत पर्ने १४ किलोमिटर लामो दाउन्ने खण्डमा सडक स्तरोन्नतिको काम चलिरहेको छ। त्यसै क्रममा विभिन्न ठाउँमा हिलो जम्ने, सडक भासिने, र आवागमनमा अवरोध हुने समस्या दोहोरिँदै आएको छ।
प्रहरी र सडक विभागको टोली घटनास्थलमा खटिएको छ। यात्रुलाई वैकल्पिक मार्ग प्रयोग गर्न तथा आवश्यक सावधानी अपनाउन आग्रह गरिएको छ।
