सिरहाको एक होटलमा युवकको शव फेला

काठमाडौं । सिरहाको एक होटलमा युवकको शंकास्पद मृत्यु भएको छ । धनगढीमाई नगरपालिका १० स्थित धनगढीमाई होटल एण्ड लजमा धनगढीमाई नगरपालिका ३ का करिब ३२ वर्षीय प्रमोद कुमार कामती मृत फेला परेको प्रहरीले जनाएको छ ।

होटल सञ्‍चालक धर्मा महतोका अनुसार विहान ९ः३० बजे एक जना महिलासँगै आएका कामती होटलमा प्रवेश गरेको जानकारी दिए । धेरै समय भइसक्दासमेत होटल चेक आउट नभएपछि ढोका खोल्दा कामती मृत अवस्थामा देखिएपछि प्रहरीलाई खबर गरेको होटल सञ्‍चालक महतोले जानकारी दिए ।कामतीसँग प्रवेश गरेकी अपरिचित महिला फरार रहेकी छन् ।

मृतक कामती वैदेशिक रोजगारीबाट आज बिहान मात्र घर आइपुगेको परिवारजनले जानकारी दिए । मृतकका बुवा रामनारायण कामतीले विदेशबाट आउनेबित्तिकै कसैलाई केही नभनी छोरा घरबाट निस्किएको बताए । मृतक कामतीको श्रीमतीसहित तीन छोरा र दुई छोरी छन् ।