धरानका मेयर साम्पाङ र आन्दोलनरत पक्षबीच ३ बुँदे सहमति

काठमाडौं । धरान उपमहानगरपालिकाका मेयर हर्क साम्पाङ र आन्दोलनरत राजनीतिक दलहबीच ३ बुँदे सहमति भएको छ । खानेपानीको शुल्क र महसुल बढाइएपछि तीन हप्तादेखि चरणबद्ध आन्दोलनमा रहेका दल र मेयर साम्पाङबीच सहमति भएको हो ।

खानेपानी महसुलमा गरिएको वृद्धि तत्काललाई स्थगित गर्ने, खानेपानी बोर्डको पूर्णताबारे उच्च अदालतको फैसला मान्ने र सात दिनभित्र बोर्डको हिसाब सार्वजनिक गर्ने सहमति भएको छ । सहमतिसँगै आन्दोलनका कार्यक्रम स्थगित गरिएको छ ।

यही साउन ११ गते धरानमा क्रियाशील राजनीतिक दलले खानेपानीको शुल्क र महसुल पुरानै कायम गर्न माग राख्दै धरान खानेपानी व्यवस्थापन बोर्डलाई ७२ घन्टे अल्टिमेटमसहित ज्ञापनपत्र बुझाएका थिए । अल्टिमेटम दिँदा पनि महसुल नघटाएपछि दलहरूले चरणबद्ध आन्दोलनको घोषणा गरेका थिए ।