- १५ जेष्ठ २०८३, शुक्रबार / May 29, 2026
काठमाडौँ । राष्ट्रिय विपद् जोखिम न्यूनीकरण तथा व्यवस्थापन प्राधिकरणले विपद्जन्य घटनाबाट प्रभावित नागरिकका लागि एकद्वार प्रणालीमार्फत राहत वितरण गर्न सबै निकायलाई आग्रह गरेको छ।
बिहीबार सिंहदरबारमा बसेको ‘क्लस्टर र को–लिड्स’ निकायहरूसँगको समन्वय बैठकमा प्राधिकरणका कार्यकारी प्रमुख दिनेश भट्टले राहत कार्य दोहोरो नहोस् भनेर एकद्वार प्रणालीलाई प्रभावकारी बनाउन सुझाव दिएका हुन्।
उनका अनुसार विपद्बाट बढी प्रभावित जिल्लामा अन्तरनिकाय समन्वयमार्फत राहत वितरण केन्द्रित गर्न सबै ‘लिड्स’ र ‘को–लिड्स’ निकायहरूलाई अनुरोध गरिएको हो।
सरकारले विपद् व्यवस्थापनमा सहजीकरणका लागि ११ वटा क्लस्टर गठन गरी तिनका लिड र को–लिड निकाय तोकेर जिम्मेवारी बाँडेको छ। बैठकमा ती क्लस्टरका प्रतिनिधिहरूले राहत व्यवस्थापनका लागि आफ्नो निकायको क्षमता र प्रभावित क्षेत्रमा भइरहेको कामबारे जानकारी गराएका थिए।
क्लस्टरहरूले विपद्को पूर्वतयारीदेखि प्रारम्भिक पुनःलाभसम्मका गतिविधिमा काम गर्नेछन्। यी क्लस्टरमा खाद्य सुरक्षा, स्वास्थ्य, पोषण, खानेपानी तथा सरसफाइ, शिक्षा, सुरक्षा, आवास, ‘क्याम्प’ समन्वय, बन्दोबस्ती, प्रारम्भिक पुनःलाभ र आपतकालीन सञ्चारका क्षेत्र समावेश छन्।
