- १५ जेष्ठ २०८३, शुक्रबार / May 29, 2026
काठमाडौँ । सर्लाहीको कौडेना गाउँपालिका–२, फूलपरासीमा सर्पले डसेपछि उपचारको सट्टा झारफुकमा लगिएकी एक महिलाको मृत्यु भएको छ।
बुधबार दिउँसो गोमन सर्पले डसेकी ४२ वर्षीया नयनदेवी यादवको उपचार नपाई निधन भएको हो। सर्पले डसेपछि उनका परिवारले उनलाई विषहरा बाबा मन्दिरमा धामीझाँक्रीमार्फत झारफुकका लागि लगेका थिए।
अवस्था गम्भीर भएपछि मात्रै उनलाई प्रादेशिक अस्पताल मलङ्गवा पुर्याइएको थियो। अस्पताल पुर्याउँदा चिकित्सकले नयनदेवीको मृत्यु भइसकेको घोषणा गरेका थिए।
नवलपुरस्थित सर्पदंश उपचार केन्द्रका इन्चार्ज तथा स्वास्थ्यकर्मी जगर्नाथ यादवका अनुसार अत्यन्त विषालु गोमन सर्पले डसेपछि तुरुन्त अस्पताल लैजानुपर्नेमा झारफुकमा समय बिताउँदा बिरामीको ज्यान गएको हो।
