देशभर विपद्को कहर : ४० दिनमा ७० जनाले गुमाए ज्यान

काठमाडौं, १० जेठ । २०८३ सालको वैशाखयता देशभर एक हजार ३४२ वटा विपद्जन्य घटना भएका छन्। राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार पछिल्लो ४० दिनको अवधिमा भएका ती घटनामा परी ७० जनाले ज्यान गुमाएका छन् भने ३३३ जना घाइते भएका छन्।

प्राधिकरणकी प्रवक्ता शान्ति महतका अनुसार सबैभन्दा बढी लेक लागेर १६ जनाको मृत्यु भएको छ। यस्तै चट्याङबाट १४, आगलागीबाट ११, हुरीबाट नौ तथा जनावरको आक्रमणबाट आठ जनाले ज्यान गुमाएका छन्। यसैगरी सर्पदंशबाट पाँच, पहिरोबाट दुई, डुङ्गा पल्टिँदा दुई तथा वन डढेलो, बाढी र हिउँपहिरोमा परेर एक÷एक जनाको मृत्यु भएको प्राधिकरणले जनाएको छ।

विपद्का घटनाबाट देशभर एक हजार ६२१ परिवार प्रभावित भएका छन्। तथ्यांकअनुसार सबैभन्दा बढी आगलागीका ४८८ वटा घटना भएका छन्। यस्तै हुरीका २३०, चट्याङका १३९ तथा सर्पदंशका १०५ वटा घटना दर्ता भएका छन्। प्राधिकरणले मनसुन नजिकिँदै गएकाले सतर्कता अपनाउन तथा स्थानीय तहदेखि नागरिकस्तरसम्म पूर्वतयारीमा जुट्न आग्रह गरेको छ।