- २२ कार्तिक २०८३, आईतवार / Nov 8, 2026
ललितपुर । ललितपुरबाट ३५ थान मोबाइलसहित एक जना पक्राउ परेका छन् । १५ लाख रुपैयाँ मूल्य बराबरका भन्सार छली चोरी पैठारी गरी ल्याएका मोवाइल सहित काठमाडौँ उपत्यका अपराध अनुसन्धान कार्यालयले पक्राउ गरेको हो ।
ललितपुरको बालकुमारी एरियामा विभिन्न कम्पनीका मोबाइलहरू राजस्व र भन्सार छली चोरी पैठारी गरी ल्याई बिक्री वितरण गर्ने गरेको भन्ने सूचनाको आधारमा काठमाडौँ उपत्यका अपराध अनुसन्धान कार्यालय मिनभवन काठमाडौँबाट खटिएको प्रहरीले उक्त कार्यमा संलग्नलाई पक्राउ गरेको हो ।
आवश्यक कारबाहीको लागि राजस्व अनुसन्धान विभाग हरिहर भवन ललितपुर पठाइएको छ । पक्राउ पर्नेमा ललितपुर महानगरपालिका–८ बालकुमारीस्थित ट्रेन्डिङ मोबाइल हबका सञ्चालक रामेछाप खाँडादेवी गाउँपालिका–२ घर भएका २२ वर्षीय सरोज योञ्जन रहेको प्रहरीले जनाएको छ ।
