जिल्लाको वर्गीकरणबमोजिम लाभग्राहीले तीन किस्तामा अनुदान पाउने

काठमाण्डौ । पुनःनिर्माणका लागि सरकारले अनुदान दिने भएको छ । सबैखाले विपद्‌बाट क्षति भएका घरको निर्माण गर्न सरकारले अनुदान दिने भएको हो । विपद् जोखिम न्यूनीकरण तथा व्यवस्थापन कार्यकारी समितिको वैशाख ३ को बैठकले पारित गरेको कार्यविधि अनुसार जिल्लाको वर्गीकरणबमोजिम लाभग्राहीले चार, पाँच र छ लाख रुपैयाँ तीन किस्तामा अनुदान पाउनेछन् ।

यसअघि भूकम्प, आगलागी र मनसुनजन्य विपद्बाट क्षति भएकाको हकमा मात्रै अनुदान दिने व्यवस्था थियो । कार्यविधिमा काठ खरिदमा सरकारी मूल्यको ९० प्रतिशत छुट र आवास निर्माण गर्न नसक्ने विपन्न, सङ्कटासन्न र अपाङ्गता भएका परिवारलाई अनुदान रकममा ५० हजार रुपैयाँ थप हुने व्यवस्था पनि छ ।

उपप्रधान एवम् गृहमन्त्री रवि लामिछानेले सबै प्रकारका विपद्बाट हुने आवासको क्षतिमा सरकारले पुनःनिर्माणका लागि अनुदान दिने कार्यविधि पारित गरेको बताउनुभएको हो । जिल्लाको वर्गीकरणअनुसार सरकारले अनुदान रकम दिने जनाएको छ ।