- २ आश्विन २०८३, शुक्रबार / Sep 18, 2026
काठमाण्डौ । लामो खडेरीले आजित भएका किसानलाई पानी परेपछि राहत मिलेको छ । किसानलाई राहत मात्रै होइन पानी परेपछि देशका सबैजसो ठाउँमा लागेको डढेलो समेत निभेको छ । मौसम पूर्वानुमान् महाशाखाले शनिवारसम्म नै पानी पर्ने जनाएपछि किसान झनै उत्साहित बनेका छन् ।
६ दिन अघिसम्म चार सयभन्दा धेरै ठाउँमा सक्रिय डढेलो रहेको भएपनि पानी परेपछि देशका कुनै पनि ठाउँमा डढेलो नभएको वन तथा भूसंरक्षण विभागले जनाएको छ ।
आइतवार र सोमवार परेको पानीले पूर्व र मध्य क्षेत्रको डढेलो निभाएको र पानीले तराई र पश्चिम क्षेत्रकोसमेत डढेलो निभाएको छ ।
महाशाखाकाअनुसार विहीबार कोशी, मधेश, बाग्मती र लुम्बिनी प्रदेशमा हल्कादेखि मध्यम वर्षा हुने सम्भावना छ । अरु ठाउँमा पनि हल्का पानी पर्ने महाशाखाले जनाएको छ ।
पानी परेको र डढेलो निभेका कारण वायुको गुणस्तर पनि सुधार भएको छ । वायु गुणस्तर मापन सूचक एक्यूआई एकसय भन्दा तल झरेको छ । वातावरण विभाग अन्तर्गतका सबैजसो वायु गुणस्तर मापन केन्द्रहरुमा यसअघि सबैजसो केन्द्रमा एक्यूआइ एक सय ५० भन्दा माथि थियो ।
