- २६ असार २०८३, शुक्रबार / Jul 10, 2026
काठमाण्डौ, १८ कार्तिक । दोलखाको गौरीशङ्कर गाउँपालिका–९, रोल्वालिङ हिमशृंखलाअन्तर्गत यलुङ री हिमालको आधार शिविरमा गएको हिमपहिरोमा परी तीन जनाको मृत्यु भएको छ भने चार जना सम्पर्कविहीन छन्।
सम्पर्कविहीनमध्ये सबै विदेशी पर्यटक रहेको जिल्ला प्रहरी कार्यालय दोलखाले जनाएको छ। प्रहरीका अनुसार, मृतकमध्ये एक जना विदेशी नागरिक र दुई जना नेपाली गाइड रहेका छन्। पाँच जना घाइते भएका छन्।
जिल्ला प्रहरी कार्यालय दोलखाका प्रहरी प्रमुख डीएसपी ज्ञानकुमार महतोका अनुसार, आरोहण दलमा पाँच विदेशीसहित १५ जना रहेका थिए। तर हालसम्म १२ जनाको मात्रै विवरण प्राप्त भएको छ।
सम्पर्कविहीन आरोहीहरूको खोजीका लागि हिजो हेलिकप्टर पठाइएको थियो तर खराब मौसमका कारण रोल्वालिङ क्षेत्रमा अवतरण हुन नसकेको उनले जानकारी दिए।
केही दिनदेखि सो क्षेत्रमा निरन्तर हिमपात भइरहेको थियो। आज मौसम अनुकूल भएमा पुनः हेलिकप्टरमार्फत खोज तथा उद्धार कार्य सुरु गर्ने तयारी भएको प्रहरीले जनाएको छ।
