आजदेखि मौसम बदलीको सम्भावना, पश्चिमी क्षेत्रमा वर्षा र हिमपात हुन सक्ने

काठमाण्डौ, १८ कार्तिक । आजदेखि देशभर मौसम पुनः बदली हुने सम्भावना रहेको जल तथा मौसम पूर्वानुमान महाशाखाले जनाएको छ। पश्चिमी वायुको प्रभावका कारण देशका धेरै ठाउँमा आंशिकदेखि सामान्य बदली रहने र केही ठाउँमा वर्षा तथा हिमपात हुने अनुमान गरिएको छ।

महाशाखाका अनुसार आज र भोलि गण्डकी, लुम्बिनी, कर्णाली र सुदूरपश्चिम प्रदेशका पहाडी भागका थोरै ठाउँमा हल्कादेखि मध्यम वर्षा/हिमपात हुन सक्छ। त्यसैगरी लुम्बिनी र सुदूरपश्चिमका तराई क्षेत्रका एक/दुई स्थानमा पनि हल्का वर्षा पर्ने सम्भावना रहेको छ।

महाशाखाका मौसमविद् हरिप्रसाद दाहालका अनुसार यसअघिको जस्तो ठूलो पानी पर्ने सम्भावना भने छैन। तर पनि मौसम परिवर्तनका कारण कृषि, पर्यटन, पर्वतारोहण र स्वास्थ्य क्षेत्रमा केही असर पर्न सक्ने भएकाले सतर्कता अपनाउन आग्रह गरिएको छ।

काठमाण्डौ उपत्यकासहित देशका मध्य तथा पश्चिमी भू–भागमा पनि पश्चिमी वायुको प्रभाव देखिने अनुमान गरिएको छ।