- ४ जेष्ठ २०८३, सोमबार / May 18, 2026
पर्सा, २२ माघ । चालु आर्थिक वर्षको पहिलो छ महिनामा पर्सा जिल्लाबाट दुई पाङ्ग्रे सवारीसाधनको आयात उल्लेख्य रूपमा बढेको छ। यस अवधिमा वीरगञ्ज नाका हुँदै ३२ हजार ३३१ वटा ‘अनएसेम्बल्ड’ मोटरसाइकल आयात भएका छन्, जसको कुल मूल्य चार अर्ब ५६ करोड रुपैयाँ रहेको छ।
वीरगञ्ज भन्सार कार्यालयका अनुसार ती सवारीसाधनको आयातबाट राज्यकोषमा चार अर्ब ४३ करोड रुपैयाँ राजस्व संकलन भएको छ। गत आर्थिक वर्षको सोही अवधिमा भने तीन अर्ब ३८ करोड रुपैयाँ बराबरका २५ हजार ८५७ वटा अनएसेम्बल्ड मोटरसाइकल आयात भएका थिए।
यस्तै, चालु आवको पहिलो छ महिनामा ४५ करोड ८१ लाख रुपैयाँ बराबरका चार हजार ५६७ वटा पूर्ण मोटरसाइकल आयात भएका छन्। गत आवको सोही अवधिमा २० करोड ७६ लाख रुपैयाँ बराबरका दुई हजार १९२ वटा मोटरसाइकल आयात भएका थिए।
विद्युतीय सवारीसाधनतर्फ पनि आयात बढ्दो क्रममा देखिएको छ। चालु आवको पहिलो छ महिनामा ५८ करोड १८ लाख रुपैयाँ बराबरका चार हजार ५९४ वटा विद्युतीय मोटरसाइकल आयात भएका छन्। अघिल्लो आर्थिक वर्षको सोही अवधिमा ३० करोड ९६ लाख रुपैयाँ बराबरका दुई हजार २१८ वटा विद्युतीय मोटरसाइकल आयात भएका थिए।
भन्सार कार्यालयका अनुसार सवारीसाधनप्रतिको बढ्दो माग, सहरी आवागमन विस्तार र विद्युतीय सवारीप्रति आकर्षण बढ्नु आयात वृद्धि हुनुका मुख्य कारण रहेका छन्।
