- ५ असार २०८३, शुक्रबार / Jun 19, 2026
काठमाडौँ, २२ माघ । सार्वजनिक खरिद अनुगमन कार्यालयले विभिन्न सार्वजनिक निकायहरूको सिफारिसका आधारमा ९ वटा निर्माण व्यवसायी तथा आपूर्तिकर्तालाई कालोसूचीमा राखेको छ।
कार्यालयले बुधबार गरेको निर्णयअनुसार सार्वजनिक खरिद ऐन, २०६३ को दफा ६३ (१) बमोजिम उक्त कारबाही गरिएको हो। सम्झौता अनुसारको काम समयमै सम्पन्न नगर्ने, सर्त उल्लङ्घन गर्ने तथा सार्वजनिक खरिद प्रक्रियामा अनियमितता देखिएको भन्दै सम्बन्धित निकायहरूले सिफारिस गरेपछि उनीहरूलाई कालोसूचीमा राखिएको कार्यालयले जनाएको छ।
कालोसूचीमा पर्ने व्यवसायी तथा आपूर्तिकर्ताहरूमा कान्छाराम कन्स्ट्रक्सन कम्पनी प्रा. लि., श्रीओम अटो ल्युब प्रा. लि., आर्कटिक कन्स्ट्रक्सन प्रा. लि., ग्रीन वर्ल्ड कन्स्ट्रक्सन प्रा. लि., अग्रिम–लङभिजन–धनलक्ष्मी जे.भी. लगायत रहेका छन्।
सार्वजनिक खरिद अनुगमन कार्यालयले बिहीबार जारी गरेको सूचनाअनुसार कालोसूचीमा परेका व्यवसायी तथा आपूर्तिकर्ताहरूले तोकिएको अवधिभर मुलुकभरका कुनै पनि सार्वजनिक निकायबाट गरिने खरिद प्रक्रिया, ठेक्का तथा आपूर्तिसम्बन्धी काममा सहभागी हुन नपाउने स्पष्ट गरेको छ।
कार्यालयका अनुसार सार्वजनिक खरिद प्रक्रियालाई पारदर्शी, प्रतिस्पर्धी र विश्वसनीय बनाउन यस्ता कारबाहीलाई निरन्तरता दिइनेछ।
