मेचीनगर–३ स्थित निन्दा खोलामा हात्ती मृत फेला

काठमाडौं । झापाको मेचीनगरमा हात्ती मृत फेला परेको छ। बिहीबार बिहान मेचीनगर–३ स्थित निन्दा खोलामा हात्ती मृत फेला परेको हो । भाले हात्ती मृत फेला परेको र शरीरमा देखिने प्रकारको कुनै पनि चोटपटक नरहेको स्थानीयको भनाई छ ।

हात्ती के कारण मरेको भन्ने खुल्न नसकेको बताइएको छ। विद्युतीय धराप लाग्दा हात्ती सोही ठाउँमा नै मर्ने भएकाले विद्युतीय धरापमा परेकोजस्तो नदेखिएको हात्ती सूचना केन्द्र बाहुनडाँगीले जनाएको छ। मृत हात्तीको परीक्षणका लागि कोशीटप्पु वन्यजन्तु आरक्षबाट पशुविशेषज्ञ टोलीले परीक्षण गर्ने र जिल्लाका विभिन्न पालिकामा अहिलेसम्म २० वटा हात्ती विभिन्न कारणले मरिसकेको जनाइएको छ ।

केही दिनदेखि यो क्षेत्रमा ३० देखि ४० सम्मको सङ्ख्यामा हात्तीहरू ओहोरदोहोर गर्दै आएका थिए। फुड पोइजनिङका कारण हात्ती मरेको हुनसक्ने डिभिजन बन कार्यालयले जनाएको छ ।