- २० असार २०८३, शनिबार / Jul 4, 2026
काठमाण्डौ, १८ भाद्र। भाषा आयोगले गाडीमा जडान गरिने विद्युतीय सङ्केत (इम्बोस्ड नम्बर प्लेट) नेपाली भाषामै हुनुपर्नेमा जोड दिएको छ।नेपालको संविधानको धारा ७ को उपधारा १ अनुसार सरकारी कामकाजको भाषा नेपाली भाषा नै हुने व्यवस्था रहेको स्मरण गराउँदै आयोगले अंग्रेजी भाषामा नम्बर प्लेट राख्ने निर्णयप्रति आपत्ति जनाएको हो।
आयोगका अनुसार संविधानले नचिनेको भाषा र लिपीमा नभई देवनागरी लिपीमा नै नम्बर प्लेट राख्नुपर्ने संवैधानिक व्यवस्था छ। सर्वोच्च अदालतले २०८१ असार ९ गते दिएको फैसलामा पनि धारा ७ को उपधारा ३ बमोजिम भाषासम्बन्धी विषय भाषा आयोगको सिफारिसअनुसार नेपाल सरकारले निर्णय गर्ने प्रावधान रहेको उल्लेख गरिएको छ।
आयोगका अध्यक्ष डा. गोपाल ठाकुरले आफ्नो संवैधानिक दायित्वअनुसार देवनागरी लिपीमै इम्बोस्ड नम्बर प्लेट राख्नुपर्ने माग गर्दै नेपाल सरकारको पुनः ध्यानाकर्षण गराइएको जानकारी दिनुभयो।
सरकारले इम्बोस्ड नम्बर प्लेटलाई अनिवार्य गर्ने तयारी अगाडि बढाए पनि पहिलाजस्तै लिपि, जडान खर्च लगायतका विषयमा प्रश्न उठिरहेका छन्। सरकारले असोज १ गतेदेखि जडान नगरे तत्काल कारबाही भने नहुने जानकारी दिइसकेको छ।
