- ५ असार २०८३, शुक्रबार / Jun 19, 2026
इटहरी, २१ साउन । प्रहरीले सुनसरी जिल्लाको कोशी गाउँपालिका–८ स्थित भीमनगर बोर्डर पोस्टबाट ३८ हजार रुपैयाँ बराबरको नक्कली नेपाली नोटसहित दुई जनालाई पक्राउ गरेको छ।
पक्राउ पर्नेमा सप्तरी जिल्लाको हनुमान कंकालिनी नगरपालिका–२ का २६ वर्षीय राजेशकुमार रजक र सोही नगरपालिकाको वडा नं. १ का २५ वर्षीय राजेश चमार रजक रहेका छन्।
प्रहरीका अनुसार उनीहरू भारतबाट नेपाल प्रवेश गर्दै थिए। लु ९२ प २३८० नम्बरको मोटरसाइकलमा सवार रहेका उनीहरूलाई शङ्कास्पद देखिएपछि जाँच गर्दा मोटरसाइकलको पछाडि बसेका राजेश चमार रजकको साथबाट १ हजार रुपैयाँ दरका ३८ थान नक्कली नेपाली नोट बरामद भएको हो।
सुनसरी प्रहरीका प्रवक्ता डीएसपी योगराज खतिवडाले दुवैजनालाई नियन्त्रणमा लिई आवश्यक अनुसन्धान सुरु गरिएको जानकारी दिए। हाल उनीहरूविरुद्ध बैंकिङ कसुर तथा फौजदारी अपराध अन्तर्गत कारवाही प्रक्रिया अगाडि बढाइएको छ।
