- ३० जेष्ठ २०८३, शनिबार / Jun 13, 2026
काठमाडाैं, ३० जेठ । आयोजक अमेरिकाले फिफा विश्वकप–२०२६ मा शानदार सुरुवात गरेको छ । अमेरिकाको लस एन्जलस स्टेडियममा आज बिहान भएको खेलमा घरेलु टोलीले पाराग्वेमाथि ४–१ को प्रभावशाली जित निकालेको हो ।
अमेरिकाको जितमा फोलारिन बालोगुनले दुई गोल गरेका थिए भने जियोभानी रेयनाले एक गोल गरे । साथै पाराग्वेका डेमियन बोबाडिल्लाले आत्मघाती गोल गरेपछि अमेरिका अग्रता बनाउन सफल भयो । पाराग्वेका लागि मौरिसियोले सान्त्वना गोल गरेका थिए ।
खेलको सातौँ मिनेटमै आत्मघाती गोलमार्फत अमेरिका अग्रता लिन सफल भयो । त्यसपछि ३१औँ मिनेटमा बालोगुनले गोल गर्दै अग्रता दोब्बर बनाए । पहिलो हाफको इन्जुरी समयमा उनले नै व्यक्तिगत दोस्रो गोल गर्दै अमेरिका ३–० ले अगाडि बढ्यो ।
दोस्रो हाफमा पाराग्वेले खेलमा फर्किने प्रयास गर्दै ७१औँ मिनेटमा गोल गरे पनि अन्तिम इन्जुरी समयमा जियोभानी रेयनाले थप गोल गर्दै अमेरिकाको ४–१ को जित सुनिश्चित गरे ।
जितसँगै अमेरिका समूह ‘डी’ मा ३ अंकसहित शीर्ष स्थानमा पुगेको छ । सो समूहमा अमेरिका र पाराग्वेसँगै अस्ट्रेलिया र टर्की पनि रहेका छन् ।
