- ३० श्रावण २०८३, शनिबार / Aug 15, 2026
काठमाडौं, ३१ असार । सामान्य प्रशासन मन्त्री राजकुमार गुप्ता घुस ‘डिल’ प्रकरणमा मुछिएपछि उहाँलाई कारबाही गर्न चौतर्फी दबाव बढेको छ। हालै सार्वजनिक भएको ९ मिनेटको अडियो रेकर्डिङमा मन्त्री गुप्ता, एक बिचौलिया पुरुष र एक महिलाबीच भएको कुराकानीमा ७८ लाख रुपैयाँ घुसको लेनदेनको कुरा भएको स्पष्ट सुनिन्छ।
उक्त अडियोअनुसार, मालपोत कार्यालय कास्कीका तत्कालीन कार्यालय प्रमुखको सरुवा रोक्न ५३ लाख र भूमि आयोग कास्कीको अध्यक्ष बनाउन २५ लाख रुपैयाँ माग गरिएको उल्लेख छ। यो संवाद करिब ६ महिनाअघि भएको भए पनि केही दिनअघि मात्रै सार्वजनिक भएको हो।
सार्वजनिक दबाबसँगै मन्त्री गुप्ताविरुद्धको उजुरी अख्तियार दुरुपयोग अनुसन्धान आयोगमा दर्ता भइसकेको छ। आयोगले प्रमाणको रूपमा अडियो विधि विज्ञान प्रयोगशालामा परीक्षण गर्न पठाएको छ। यता प्रधानमन्त्री केपी शर्मा ओलीले मन्त्री गुप्तालाई बोलाएर छलफल गरे पनि उहाँको बर्खास्ती या राजीनामा सम्बन्धी कुनै औपचारिक निर्णय भएको छैन।
प्रधानमन्त्रीले सुशासनको पक्षपाती भनी बताउँदै आउँदा आएको यो प्रकरणमा मौनता देखाउनुले सरकारको प्रतिबद्धता माथि प्रश्न उठाएको विश्लेषण भइरहेको छ। सडकदेखि संसदसम्म नागरिक समाज, विपक्षी दल तथा मिडियाबाट गुप्ताको तत्काल बर्खास्ती र निष्पक्ष छानबिनको माग गरिएको छ।
