तोलाको २ लाख ३५ हजार नाघ्यो सुनको भाउ, फेरि नयाँ कीर्तिमान

काठमाडौँ, २१ असाेज । सुनको मूल्यमा फेरि एकपटक नयाँ रेकर्ड कायम भएको छ। नेपाल सुनचाँदी व्यवसायी महासङ्घका अनुसार आज सुनको भाउ तोलाको दुई लाख ३५ हजार चार सय रुपैयाँ पुगेको छ।

हिजोको तुलनामा आज सुनको भाउ तोलाको दुई हजार तीन सय रुपैयाँले वृद्धि भएको हो। हिजो तोलाको दुई लाख ३३ हजार एक सय रुपैयाँमा कारोबार भएको थियो।

चाँदीको भाउ भने यथावत रहेको छ। आज पनि चाँदी तोलाको दुई हजार नौ सय साठ्ठी रुपैयाँमै कारोबार भइरहेको महासङ्घले जनाएको छ।

बजार विश्लेषकहरूका अनुसार अन्तर्राष्ट्रिय बजारमा सुनको मूल्य निरन्तर बढ्दै जाँदा यसको असर नेपालमा पनि देखिएको हो।