- २९ श्रावण २०८३, शुक्रबार / Aug 14, 2026
दोलखा, २० असार । दोलखाको विगु गाउँपालिका–१ मा पर्ने गोंगर खोलामा डरलाग्दो बाढी आएको छ। बाढीका कारण सिंगटी बजार क्षेत्रमा उच्च सुरक्षा सतर्कता अपनाइएको वडाध्यक्ष मेमबहादुर तामाङले जानकारी दिएका छन्।
वडाध्यक्ष तामाङका अनुसार दोलखाको उत्तरी भेगमा परेको भारी वर्षापछि खोलामा अचानक बाढी आएको हो। “अहिलेसम्म धनजनको क्षति भएको जानकारी छैन, तर स्थिति मूल्यांकन गर्दै छौं,” तामाङले बताएका छन्।
उक्त गोंगर खोला तामाकोसी नदीमा मिसिने खोलामध्ये एक हो, जसले गर्दा तल्लो क्षेत्रमा अझै उच्च सतर्कता आवश्यक भएको जनाइएको छ।
स्थानीय प्रशासन, सुरक्षाकर्मी र विपद् व्यवस्थापन टोली सिंगटी बजार क्षेत्रमा तयारी अवस्थामा रहेका छन्। बाढीको थप जोखिमलाई मध्यनजर गर्दै नजिकका बासिन्दालाई सतर्क रहन आग्रह गरिएको छ।
