किशोरी हत्याका आरोपी भण्डारी सार्वजनिक

डडेल्धुरा । पोखरामा १४ वर्षीया किशोरीको हत्या गरेको आरोपमा स्थानीय एकजनालाई सार्वजनिक गरिएको छ ।

शनिबार डडेल्धुराको पोखरा बजारमा मृत फेला परेकी १४ वर्षीया आरती भट्टराईको हत्या आरोपमा पक्राउ परेका स्थानीय स्टेसनरी व्यापारी टेकबहादुर भण्डारीलाई जिल्ला प्रहरी कार्यालय डडेल्धुरामा पत्रकार सम्मेलनमार्फत आज सार्वजनिक गरिएको हो ।

अमरगढी नगरपालिका– ७ की बालिका भट्टराईको हत्या गरिएको थियो । भण्डारीले भट्टराईको हत्या गरेको स्वीकार गरिसकेको डडेल्धुरा प्रहरीका प्रमुख तथा प्रहरी नायब उपरीक्षक सुगन्ध श्रेष्ठले बताए । घटना टेकबहादुर भण्डारीको स्टेसनरी पसल नै हो ।

डिएसपी श्रेष्ठले भने, ‘पसलभित्र कोठामा आवेगमा आएर भट्टराईको घाँटी थिची हत्या गरेको भण्डारीले स्वीकार गरे ।’ स्थानीयले भने बलात्कारपछि हत्या भएको दाबी गर्दै कडा कारबाहीको माग गरेका छन् ।