काठमाडौं, १० आज पनि तराईका भू–भागका साथै केही पहाडी क्षेत्रमा तातो लहर कायमै रहने भएकाले सतर्कता अपनाउन मौसम पूर्वानुमान महाशाखाले आग्रह गरेको छ।
महाशाखाका अनुसार सुदूरपश्चिम र लुम्बिनी प्रदेशका पहाडी भू–भागमा तातो दिन रहनेछ भने तराई क्षेत्रमा तातो लहर चल्ने सम्भावना उच्च छ।
अधिकतम तापक्रम ४० डिग्री सेल्सियस वा सोभन्दा माथि पुग्ने अनुमान गरिएको छ, जसले अत्यधिक गर्मीको अवस्था सिर्जना गर्नेछ। यस्तो तातो हावाको लहरले मानव स्वास्थ्यमा सामान्यदेखि गम्भीरसम्म असर पार्न सक्ने भएकाले सावधानी अपनाउन अनुरोध गरिएको छ।
दिपायल, धनगढी, नेपालगन्ज, वीरेन्द्रनगर र भैरहवा क्षेत्रमा अधिकतम तापक्रम ४१ डिग्री सेल्सियसभन्दा माथि पुग्ने अनुमान गरिएको छ। यी स्थानहरूमा अहिले बिहानको न्यूनतम तापक्रम २७ देखि २९ डिग्री सेल्सियसको आसपास रहेको छ।
त्यसैगरी आज मधेश र कोशी प्रदेशका तराई भू–भागका केही स्थानहरूमा हावाहुरी चल्ने सम्भावना रहेको छ। पश्चिमी र स्थानीय वायु तथा पूर्वी नेपालको नजिक रहेको न्यून चापीय क्षेत्रको प्रभावका कारण केही पहाडी भू–भागमा हावाहुरीसहित सामान्यदेखि मध्यम वर्षाको सम्भावनासमेत रहेको महाशाखाले जनाएको छ।
