- २१ कार्तिक २०८३, शनिबार / Nov 7, 2026
काठमाडौँ, ६ भदौ । आज देशका विभिन्न स्थानमा ठूलो वर्षा हुने सम्भावना रहेको मौसम पूर्वानुमान महाशाखाले जनाएको छ। महाशाखाका अनुसार दिउँसो कोशी, बागमती, गण्डकी र लुम्बिनी प्रदेशको पहाडी भू–भागका केही ठाउँमा तथा तराई भू–भागका थोरै ठाउँमा मध्यम वर्षा हुने देखिएको छ।
यस्तै, राति गण्डकी र सुदूरपश्चिम प्रदेशका पहाडी भू–भागका एक–दुई ठाउँमा ठूलो पानी पर्ने सम्भावना छ। गएराति पनि गण्डकी पश्चिमका केही ठाउँमा ठूलो वर्षा भएको थियो।
कास्की, गोरखा, रुपन्देही, पाल्पा, दाङ, रुकुम पूर्व, नवलपरासी, कपिलवस्तु, बाँके र रोल्पामा १२ घण्टामै १०० मिलिमिटरभन्दा बढी वर्षा मापन गरिएको महाशाखाले जनाएको छ।
भारी वर्षाका कारण ती जिल्लाका खोलानदीमा बाढी आएको छ। महाशाखाका अनुसार हाल मनसुनको न्यूनचापीय रेखा सरदर स्थानकै आसपासमा अवस्थित छ।
