- २८ श्रावण २०८३, बिहीबार / Aug 13, 2026
भक्तपुर । भक्तपुरको सूर्यविनायक नगरपालिकाले माल्दिभ्समा पदक जित्ने खेलाडीलाई बधाई सहित सम्मान गरेको छ । १५ औं विश्व बडीबिल्डिङ एण्ड फिजिकल स्पोर्टस् च्याम्पियनसिप, २०२४ मा पदकप्राप्त गर्ने सूर्यविनायक बासी सनम मुलगुठीलाई बुधबार सूर्यविनायक नगरपालिकाले बधाई सहित सम्मान गरेको हो ।
यही ५ देखि ११ नोभेम्बरमा माल्दिभ्समा भएको १५ औं विश्व बडीबिल्डिङ एण्ड फिजिकल स्पोर्टस् च्याम्पियनसिप, २०२४ मा मुलगुठीले महिला वान पिस स्विमसुटमा रजत जितेर दोस्रो स्थान हासिल गरेकी हुन ।
मुलगुठीलाई बधाई तथा सम्मान गर्दै सूर्यविनायक नगरपालिकाका मेयर बासुदेव थापाले सूर्यविनायक नगरपालिका भौतिक विकाससंगै खेलकुदको विकासमा समेत अघिबढेको बताउनुभयो । नगरपालिकाले खेलमैदान निर्माणमा विशेष ध्यान दिएको जानकारी दिदै खेलाडी राष्ट्रका गहना भएकाले देशकै नाम उच्च राख्ने र विश्वमा देश चिनाउन महत्वपूर्ण भूमिका खेलाडीको हुने तर्क गर्नुभयो ।
माल्दिभ्समा सनमले पाएको सफलता महत्वपूर्ण भएकाले नगरपालिका र ५४ जना जनप्रतिनिधिकै तर्फबाट बधाई दिदै खेलाडीको सम्मानका लागि नगरपालिकाको तर्फबाट ९९ हजारको चेक समेत हस्तान्तरण गर्नुभयो ।
कार्यक्रममा सूर्यविनायक नगरपालिकाका जनप्रतिनिधि, कर्मचारी र खेलप्रमेमीहरुको उपस्थिति रहेको थियो । सनमलाई उपमेयर सरिता तिमलसिना भट्टराई, प्रवक्ता रविन्द्र सापकोटा, वडा नं ८ वडा अध्यक्ष पुष्पराज बस्नेत, वडा नं २ का अध्यक्ष प्रदिव कार्की लगायतले बधाई तथा सम्मान गर्नुभएको थियो ।
नगरपालिकाले आफूलाई सम्मान गरेकोमा खुशी व्यक्त गर्दै मुलगुठीले अझै जिम्मेवारी बढेको बताइन । उनले अन्र्तराष्ट्रिय मैदानमा सफलता पाउनु आफ्ना लागि खुशी कुरा भएको बताउँदै आगामी दिनमा खेलाडीलाई उत्साह दिने कुरामा नगरपालिकाको निरन्तर ध्यान जानेमा आफू विश्वस्त रहेको बताइन ।
माल्दिभ्समा कात्तिक २० गतेदेखि २५ गतेसम्म उक्त प्रतियोगिता भएको थियो ।
भिडियाे..
