- २४ बैशाख २०८३, बिहीबार / May 7, 2026
भक्तपुर । नेपाल सरकारले मंसिर १ बाट १४ वर्षमुनिका बालबालिकाको क्यान्सर उपचार निःशुल्क गर्ने घोषणा गरेपछि भक्तपुर क्यान्सर अस्पतालमा बालबालिकाको निःशुल्क क्यान्सर उपचार सेवा सुरु भएको छ । अस्पतालले आज पत्रकार सम्मेलन गरेर निःशुल्क सेवा उपलब्ध गराएको जानकारी दिएको हो ।
पत्रकार सम्मेलनमा स्वास्थ्य तथा जनसंख्या मन्त्री प्रदीप पौडेलले आफ्नै पालामा धेरै धनराशि खर्च हुने क्यान्सर उपचार निःशुल्क गर्ने नीति लिएको बताए । नेपालमा करिब ११ प्रतिशत क्यान्सरका कारण ज्यान जाने गरेको भन्दै सन् २०२२ मा क्यान्सरका २२ हजार नयाँ बिरामी देखिएकामा १४ हजारभन्दा बढीले ज्यान गुमाएको जिकिर गरे । रोग जटिल बन्न नदिन बालबालिकाको क्षेत्रमा यसो गरिएको मन्त्री पौडेलको भनाइ छ ।
मन्त्री पौडेलले सरकारी अस्पतालमा १४ वर्षमुनिका बालबालिकाको क्यान्सर उपचार निःशुल्क गर्नेगरी गत कात्तिक ११ गते मन्त्रीस्तरीय निर्णय गरेको र अहिले तीन वटा अस्पतालले उक्त निर्णयलाई कार्यान्वयनमा ल्याएको बताए । भक्तपुर क्यान्सर अस्पताल, कान्ति बाल अस्पताल काठमाडौँ र बिपी कोइराला मेमोरियल क्यान्सर अस्पताल भरतपुर चितवनमा उक्त सेवा निःशुल्क गरिएको बताए ।
हरेक वर्ष करिब १५ सय बालबालिकामा क्यान्सर देखिने गरेको अस्पतालका निर्देशक निर्देशक डा. उज्ज्वल चालिसेले बताए । अस्पतालमा करिब ६० जना क्यान्सर रोगका बालबालिका उपचारका लागि आइरहेको बताउँदै अब उपचार निःशुल्क भएपछि दोब्बरले बढेर जाने उनको भनाइ छ । क्यान्सर रोगको उपचारसँगै आवश्यक पर्ने ३५ प्रकारका औषधि निःशुल्क प्रदान गरिने पनि अस्पतालले जनाएको छ ।
