- १ आश्विन २०८३, बिहीबार / Sep 17, 2026
सर्लाही ।सर्लाहीको बलरा नगरपालिका-२ जमुनियामा प्रहरीले एक भारतीय नागरिकलाई नक्कली नेपाली नोटसहित पक्राउ गरेको छ। भारतबाट नेपाल प्रवेश गर्ने क्रममा चेकजाँच गर्दा उक्त व्यक्तिको साथबाट नक्कली नोट फेला परेको हो।
प्रहरी चौकी छन्कीटोला स्थित टोलीले भारततर्फबाट आइरहेको BR 30 AE 8363 नम्बरको मोटरसाइकललाई शंका लागेर रोक्यो। मोटरसाइकल चालक विश्वनाथ साह (३४), बिहार राज्यको सितामढी जिल्लास्थित मधुकरपुर गाउँपालिका-९ का निवासी हुन्।
चेकजाँचमा साहको साथबाट नेपाली हजार दरका आठ थान नक्कली नोट र नेपाली ४ हजार ५ सय ९० र भारतीय ६ हजार ३ सय ४५ रुपैयाँ बरामद भएका छन्।
प्रहरीले साहलाई नक्कली र सक्कली नोटसहित र मोटरसाइकलबाट नियन्त्रणमा लिई सर्लाही जिल्ला अदालतबाट म्याद थप गरी थप अनुसन्धान सुरु गरेको छ। यो घटनाले सीमावर्ती क्षेत्रहरूमा नक्कली नोटको ओसारपसार अझै सक्रिय रहेको संकेत गर्छ।
