- ४ जेष्ठ २०८३, सोमबार / May 18, 2026
काठमाडौँ, २३ माघ । राष्ट्रिय सभाको विधायन व्यवस्थापन समितिमा अभौतिक सांस्कृतिक सम्पदा (संरक्षण) विधेयक, २०८१ माथिको दफावार छलफल सम्पन्न भएको छ ।
शुक्रबार सिंहदरबारमा बसेको समितिको बैठकले सहमति हुन नसकेका विषयहरू प्रतिवेदनमै छलफल गर्ने गरी दफावार छलफल टुंग्याएको हो । नेपाल अभौतिक सांस्कृतिक सम्पदा संरक्षणसम्बन्धी महासन्धि, २००३ को पक्ष राष्ट्र भएकाले उक्त महासन्धिको प्रभावकारी कार्यान्वयन गर्न आवश्यक कानुनी व्यवस्था गर्न यो विधेयक ल्याइएको हो ।
बैठकमा बोल्दै समितिकी सभापति तुलसाकुमारी दाहालले छलफलमार्फत टुंग्याइएका विषयहरूलाई मस्यौदा प्रतिवेदनको रूपमा तयार पार्न समिति सचिवालयलाई निर्देशन दिइन् । साथै, भाषिक तथा सहमति जुट्न नसकेका विषयहरूमा आवश्यक गृहकार्य गर्न संस्कृति, पर्यटन तथा नागरिक उड्डयन मन्त्रालयलाई सुझाव दिइन् ।
सभापति दाहालले सहमति जुट्न नसकेका विषयमा विज्ञहरूसँग थप छलफल गरेर अघि बढ्ने जानकारी पनि गराइन् । छलफलमा सहभागी सांसदहरूले सूचीकृत अभौतिक (अमूर्त) सांस्कृतिक सम्पदाको दुरुपयोग वा बेचबिखन भएमा प्रचलित कानूनअनुसार दोषीलाई कडा सजायको व्यवस्था गर्नुपर्नेमा जोड दिए ।
साथै, अभिलेखिकरण तथा सूचीकृत सम्पदाहरूको संरक्षणका लागि सरकारले अनिवार्य रूपमा योजना तथा कार्यक्रम बनाई कार्यान्वयन गर्नुपर्ने बाध्यकारी व्यवस्था विधेयकमा समावेश हुनुपर्ने माग राखेका छन् ।
