- १५ जेष्ठ २०८३, शुक्रबार / May 29, 2026
काठमाण्डौ, २० कार्तिक । भदौ २३ र २४ गतेको घटनाबारे छानबिन गर्न गठित जाँचबुझ आयोगले नेपाल प्रहरीका महानिरीक्षक चन्द्रकुबेर खापुङसँग स्पष्टीकरण मागेको छ। आयोगले खापुङलाई २४ घण्टे समय दिँदै जबाफ पेश गर्न भनेको हो।
आयोगका प्रवक्ता तथा सदस्य विज्ञानराज शर्माका अनुसार, आयोग गठन भएको केही समयमै भदौ २३–२४ गतेका दिनमा को–को खटिएका थिए भन्ने विवरण प्रहरीबाट माग गरिएको थियो। आयोगको पत्र २२ दिनसम्म प्रहरी प्रधान कार्यालयले जवाफ उपलब्ध गराएको थिएन।
अन्ततः आयोगले पुनः पत्र लेखेर विवरणबारे सोध्दा, आइजीपीदेखि जवानसम्म खटिएको जनाइएको थियो। तर, विस्तृत विवरण नपठाएपछि आयोगले आइतवार आइजीपी खापुङकै नाममा २४ घण्टाभित्र जवाफ पेश गर्न प्रधान कार्यालयमा पत्र पठाएको थियो।
प्रधान कार्यालयले जवाफ फर्काउँदै विवरण काठमाडौँ उपत्यका प्रहरी कार्यालयबाट उपलब्ध गराउन समय लाग्ने जनाएको थियो। यसरी पनि प्रधान कार्यालयले आवश्यक विवरण नदिएपछि आयोगले प्रत्यक्ष रूपमा महानिरीक्षक खापुङसँग स्पष्टीकरण लिन थालेको हो।
