- ४ चैत्र २०८२, बुधबार / Mar 18, 2026
एजेन्सी, ४ चैत्र । मध्यपूर्वमा जारी युद्धबीच इरानको सर्वोच्च राष्ट्रिय सुरक्षा परिषद्का सचिव अली लारिजानी इजरायली आक्रमणमा मारिएको पुष्टि भएको छ । तेहरानमा मङ्गलवार राति भएको आक्रमणमा लारिजानीका छोरासहित सुरक्षाकर्मीहरू पनि मारिएको अन्तर्राष्ट्रिय सञ्चारमाध्यमले जनाएका छन् ।
यसअघि इजरायलले लारिजानी मारिएको दाबी गरेको थियो । अब इरानले पनि उक्त दाबीलाई आधिकारिक रूपमा स्वीकार गरेको छ । इरानको सुरक्षा तथा राजनीतिक संरचनामा प्रभावशाली मानिएका लारिजानीको मृत्यु देशका लागि ठूलो क्षति भएको विश्लेषकहरूको भनाइ छ ।
युद्धले जटिल मोड लिँदै गर्दा अमेरिका–इजरायल र इरानबीचको संघर्ष १८औँ दिनमा प्रवेश गरेको छ । इजरायलले लेबनानको टायर शहरमा नयाँ विस्थापन आदेश जारी गरेपछि हजारौँ सर्वसाधारण सुरक्षित स्थानतर्फ सरेका छन् ।
निरन्तर बमबारीका कारण लेबनानमा ठूलो जनधनको क्षति भएको छ भने १० लाखभन्दा बढी मानिस विस्थापित भएका छन् । राष्ट्रसङ्घले यस्ता आक्रमण अन्तर्राष्ट्रिय मानवीय कानुनविपरीत हुन सक्ने र युद्ध अपराधको रूपमा लिन सकिने चेतावनी दिएको छ ।
यता होर्मुज जलमार्ग क्षेत्रमा पनि तनाव बढ्दै गएको छ । इरानले ‘स्ट्रेट अफ होर्मुज’ क्षेत्रमा अवरोध गरेपछि विश्वको २० प्रतिशतभन्दा बढी तेल तथा प्राकृतिक ग्यासको आपूर्ति प्रभावित भएको छ । यसका कारण अन्तर्राष्ट्रिय बजारमा तेल र ग्यासको मूल्य बढ्ने दबाब सिर्जना भएको छ ।
