- २६ असार २०८३, शुक्रबार / Jul 10, 2026
काठमाडौँ, ४ फागुन । विश्वविख्यात बहुराष्ट्रिय कम्पनीहरूले आफ्ना ट्रेडमार्क (ब्रान्ड)सँग नाम र लोगो जुधाएको भन्दै नेपाली उद्योगहरूविरुद्ध दिएको उजुरीमाथि उद्योग विभागले सक्रियता बढाएको छ ।
विभागले आइतबार सार्वजनिक सूचना जारी गर्दै उजुरी परेका ११ वटा नेपाली उद्योगलाई सात दिनभित्र लिखित जवाफसहित उपस्थित हुन अन्तिम अल्टिमेटम दिएको हो । यसअघि विभागले सम्बन्धित उद्योगहरूको ठेगानामा लिखित प्रतिक्रिया माग गर्दै पत्र पठाएको भए पनि हालसम्म कुनै जवाफ प्राप्त नभएको तथा म्याद तामेली प्रतिवेदन समेत नआएकाले सार्वजनिक सूचना जारी गर्नुपरेको जनाएको छ ।
विभागद्वारा जारी सूचनामा भनिएको छ, “सूचना प्रकाशित भएको मितिबाट बाटोको म्याद बाहेक सात दिनभित्र विभागको कानुन शाखामा सबुत प्रमाणसहित लिखित प्रतिक्रिया पेस गरी हाजिर हुन सूचित गरिन्छ ।”
तोकिएको समयसीमाभित्र प्रतिक्रिया नआएमा प्रचलित कानुनअनुसार कारबाही प्रक्रिया अघि बढाइने र पछि कुनै उजुरी सुन्ने अवस्था नहुने चेतावनी समेत विभागले दिएको छ ।
