खाडीका ७ देशमा पुनः श्रम स्वीकृति दिने सरकारको निर्णय

काठमाण्डौ, ४ फागुन । सरकारले संयुक्त अरब इमिरेट्स (यूएई)सहित कतार, ओमान, यमन, जोर्डन, साउदी अरब र टर्कीमा कार्यरत नेपाली श्रमिकलाई पुनः श्रम स्वीकृति दिने निर्णय गरेको छ । यस निर्णयसँगै बिदामा नेपाल आएका नेपाली श्रमिकलाई पुनः रोजगारदाता देशमा फर्किने बाटो खुलेको छ ।

मध्यपूर्व क्षेत्रमा विकसित युद्ध र अस्थिर अवस्थाका कारण सरकारले फागुन १७ गतेदेखि ती देशका लागि श्रम नवीकरण प्रक्रिया रोकेको थियो । श्रम, रोजगार तथा सामाजिक सुरक्षा मन्त्रालयका अनुसार पछिल्लो सुरक्षा अवस्था र जोखिम मूल्याङ्कनपछि पुनः श्रम स्वीकृति दिने निर्णय गरिएको हो ।

यद्यपि इरान, इजरायल, बहराइन, कुवेत, इराक र लेबनानमा कार्यरत नेपाली श्रमिकलाई भने श्रम नवीकरण नदिने निर्णय यथावत् राखिएको छ । वैदेशिक रोजगार विभागका अनुसार गएको माघसम्म नयाँ र पुरानासहित ७० हजार ५ सय ३ नेपालीलाई वैदेशिक रोजगारीका लागि श्रम स्वीकृति दिइएको थियो ।

तीमध्ये ४८ हजार २ सय २६ जनाले मध्यपूर्वका १२ देशमा जाने अनुमति लिएका थिए । नेपाली श्रमिकका प्रमुख गन्तव्य देशमध्ये कुवेत, यूएई, साउदी अरब र कतार प्रमुख रहेका छन् ।

गएको फागुन महिनामा विभागले नयाँ र पुरानो गरी ५२ हजार जनालाई श्रम स्वीकृति दिएको छ । सरकारले मध्यपूर्वका तनावग्रस्त देशमा अनावश्यक यात्रा नगर्न तथा अत्यावश्यक बाहेकका यात्रा स्थगित गर्न समेत नागरिकलाई आग्रह गरेको छ ।