झापा, ९ जेठ । जिल्ला कारागार झापामा कैद सजाय भुक्तान गरिरहेका एक जना कैदीबन्दीको उपचारका क्रममा मृत्यु भएको छ।पाँचथरको साविक नागी गाविस–९ घर भएका ६४ वर्षीय चन्द्रकुमार घिमिरेको बिर्तामोडस्थित बिएण्डसी अस्पतालमा उपचारका क्रममा आज बिहान मृत्यु भएको जिल्ला प्रहरी कार्यालय झापाले जनाएको छ।
प्रहरीका अनुसार घिमिरे जबर्जस्ती करणी मुद्दामा १० वर्ष कैद सजाय भुक्तान गरिरहेका थिए। उनलाई जेठ ७ गते साँझ श्वासप्रश्वासमा समस्या देखिएपछि मेची प्रादेशिक अस्पताल भद्रपुर लगिएको थियो। त्यहाँबाट थप उपचारका लागि सोही रात ओमसाई पाथीभरा अस्पताल भद्रपुर रिफर गरिएको थियो।
त्यहाँ आइसियुमा राखेर उपचार भइरहेका बेला स्वास्थ्य अवस्था झनै जटिल बनेपछि उनलाई बिएण्डसी अस्पताल बिर्तामोडमा पठाइएको थियो। उपचारकै क्रममा बिहान ३ः४५ बजे उनको मृत्यु भएको जिल्ला प्रहरी कार्यालय झापाका प्रहरी नायब उपरीक्षक खगेन्द्रबहादुर खड्काले जानकारी दिए।
जिल्ला अदालत झापाको फैसलाअनुसार घिमिरेले आठ वर्ष आठ महिना एक दिन कैद सजाय भुक्तान गरिसकेका थिए। मृतकको शव हाल बिएण्डसी अस्पतालमा राखिएको प्रहरीले जनाएको छ।
