- ९ जेष्ठ २०८३, शनिबार / May 23, 2026
काठमाण्डौ, ९ जेठ । प्रतिनिधिसभा अन्तर्गत राज्य व्यवस्था तथा सुशासन समितिले होल्डिङ सेन्टरमा रहेका बालबालिकाको पठनपाठन तत्काल सुरु गर्न सरकारलाई निर्देशन दिएको छ।
समिति सभापति हरि ढकालले हस्ताक्षर गरेको पत्रमार्फत होल्डिङ सेन्टरमा रहेका दीर्घ रोगीको यथार्थ पहिचान गरी नियमित उपचारको सुनिश्चितता गर्न पनि सरकारलाई निर्देशन दिइएको छ। साथै यसबारे गरिएको कार्य प्रगतिबारे एक हप्ताभित्र समितिलाई जानकारी गराउन भनिएको छ।
त्यस्तै होल्डिङ सेन्टरमा रहेका तर विभिन्न रोजगारीमा संलग्न सुकुम्वासीलाई रोजगारी निरन्तरता दिन सहज हुने गरी पायक पर्ने स्थानमा बस्ने व्यवस्था मिलाउन पनि निर्देशन दिइएको छ।
समितिले विपद् जोखिम न्यूनीकरणका लागि तीनै तहका सरकारलाई पूर्वतयारी गर्न आग्रह गरेको छ। विपद् व्यवस्थापनका बेला खटिने कर्मचारी तथा सुरक्षाकर्मीको बिमा गर्न सम्बन्धित निकायलाई निर्देशन समेत दिइएको छ। समितिका अनुसार यी निर्देशनहरू तत्काल कार्यान्वयन गरी प्रगति विवरण नियमित रूपमा पेश गर्नुपर्नेछ।
