- २४ भाद्र २०८३, बुधबार / Sep 9, 2026
आर्थिक वर्ष २०८१/८२ मा झापामा १,२९६ सवारी दुर्घटना
दुर्घटनामा ९५ जनाको ज्यान, १३९ गम्भीर घाइते, १,९३४ सामान्य घाइते
मापसेमा ३,१७४ चालक कारबाहीमा, १८ लाख रुपैयाँभन्दा बढी जरिवाना
५२,८७५ चालकलाई कारबाही, ३ करोड ९५ लाखभन्दा बढी राजस्व संकलन
TVRS र अनलाइन जरिवाना प्रणाली लागू
८,४६१ विद्यार्थीलाई ट्राफिक नियम कक्षा, १,२५० जनालाई मापसे सचेतना
स्थानीय तह, विद्यालय, अस्पताल र समुदायसँग सहकार्यमा सचेतना कार्यक्रम
काठमाडौँ, ३ साउन । झापामा सवारी दुर्घटना हुँदा ९५ जनाले ज्यान गुमाएका छन् । आर्थिक वर्ष २०८१८२ मा १२९६ दुर्घटनामा ९५ जनाले ज्यान गुमाएका हुन भने १ हजार ९ सय ३४ जना सामान्य घाइते र १३९ जना गम्भीर घाइते भएका हुन ।
मादक पदार्थ सेवन (मापसे) अन्तर्गत तीन हजार १७४ जना कारवाहीमा परेका छन्, जसबाट १८ लाख रुपैयाँभन्दा बढी जरिवाना सङ्कलन भएको झापा प्रहरीले जनाएको छ । एक वर्षको अवधिमा ५२ हजार ८७५ जना सवारी चालकलाई कारबाही गरिएको छ भने उक्त कारबाहीबाट तीन करोड ९५ लाख ५५ हजार ५६० रुपैयाँ राजस्व संकलन भएको जिल्ला ट्राफिक प्रहरी कार्यालय झापाले जनाएको छ ।
ट्राफिक व्यवस्थापनलाई प्रविधिमैत्री बनाउँदै जिल्लामा ट्राफिक भ्वाइलेशन रिकार्ड प्रणाली (टीभीआरएस) र अनलाइन जरिवाना तिर्ने प्रणाली लागू गरिएको जनाइएको छ । गत आर्थिक वर्ष २०८१ र ८२ मा कार्यालयले सवारी नियमनका लागि ७० थान रिफ्लेक्टर बेल्ट, ३० ट्राफिक साइन बोर्ड, ४ म्याजिक लाइट, ३ ब्रीथालाइजर, ७ कम्प्युटर, १ गोप्रो क्यामेरा र १ ल्यापटप प्रयोगमा ल्याएको छ ।
जिल्लाभर ट्राफिक सचेतनामूलक कार्यक्रम अन्तर्गत विद्यालय तहका आठ हजार ४६१ विद्यार्थीलाई ट्राफिक नियमसम्बन्धी कक्षा दिइएको छ भने १२५० जनालाई मापसे सचेतना प्रशिक्षण प्रदान गरिएको जिल्ला ट्राफिक प्रहरी कार्यालय झापाले जनाएको छ।
कक्षा ६ देखि १० सम्मका विद्यार्थी, अटोरसिटी चालक, तथा समाजका अन्य पक्षलाई लक्षित गरी गरिएको कार्यक्रमले सडक सुरक्षामा साझा प्रयासको सन्देश दिएको र ट्राफिक सुधार अभियानमा विभिन्न स्थानीय तह, विद्यालय, अस्पताल, सञ्चार संस्था र सामुदायिक केन्द्रसमेतको सहकार्य गरिएको जिल्ला ट्राफिक प्रहरी कार्यालय झापाले जनाएको छ ।
