भक्तपुरदेखि नगरकोटसम्म पुग्ने सडक पुननिर्माण सम्पन्न नभए आन्दोलन गर्ने चेतावनी

भक्तपुर । केन्द्र र प्रदेश सरकारले अझै काम नगरे हिंसात्मक आन्दोलन गर्ने चाँगुनारायण नगरपालिकाले चेतावनी दिएको छ । नगरपालिकाका प्रमुख जीवन खत्रीले बारम्वारको ताकेताले पनि भक्तपुरदेखि नगरकोटसम्म पुग्ने सडक पुननिर्माण सम्पन्न नभएकाले यसविद्धरु हिंसात्मक आन्दोलनको चेतावनी दिएका हुन् ।

धेरैपटक आग्रह गर्दापनि निर्माण कम्पनीले वेवास्ता गर्दै आएको र सरकारले कार्यअवधि थप्दै आएको भन्दै प्रमुख खत्रीले लोकतान्त्रिक आन्दोलनलाई वेवास्ता गरे हिंसात्मक आन्दोलन गर्ने बताए । नेपाल प्रेस सोसाइटी भक्तपुरको आयोजनामा नगरकोट भ्रमण वर्ष २०८२ को तयारी र समग्र चाँंगुनारायण नगरपालिकाको समृद्धि विषयक अन्तरक्रियामा नगरप्रमुख जीवन खत्रीले भ्रमण वर्ष अगावै सडकको काम सकाउनु पर्ने बताए ।

भ्रमण वर्षलाई नकारात्मक प्रभाव पार्ने अवस्था आए हिंसात्मक आन्दोलनमा जानुको विकल्प नभएको जिकिर गरे । उनले भ्रमण वर्षको सम्पूर्ण तयारी पूरा भइसकेको बताए । २०८२ वैशाख १ गतेदेखि भ्रमण वर्ष सुरु हुने उनको भनाइ छ । भ्रमण वर्षको क्रममा वर्षभरि नगरपालिकाको वडा नं १ देखि ९ सम्मकै सम्पूर्ण क्षेत्रमा विभिन्न क्रियाकलापहरु हुने जनाए ।

नगरबासीको आर्थिक समृद्धिमा सहयोग पुग्ने विश्वास गर्दै चाँंगुनारायण नगरपालिकामा दोश्रो पटक स्थानीय निकायको निर्वाचन भएर २०८० मा जीवन खत्रीको नेतृत्वमा चाँंगुनारायण नगरपालिकामा नयाँं जनप्रतिनिधि आएको पहिलो बैठकमै नगरकोट भ्रमण वर्ष २०८२ को घोषणा भएको थियो ।

घोषणा लगतै नगरपालिकाले तयारीको काम थालेको भन्दै प्रमुख खत्रीले भ्रमण वर्षलाई सफल पार्न सवैसँंग सहयोगको आशा गरेको बताए । कार्यक्रममा चाँंगुनारायण नगरपालिका वडा नं ६ नगरकोटका वडा अध्यक्ष धनबहादुर लामाले नगरकोट भ्रमण वर्ष २०८२ का विविध विषयमा चर्चा गरेका थिए ।