- १५ जेष्ठ २०८३, शुक्रबार / May 29, 2026
काठमाडाैं, ११ मंसिर । झापा गाउँपालिका – २ र गौरीगञ्ज गाउँपालिका – १ जोड्ने ७२३ मिटर लामो कन्काई पुल निर्माणको ठेक्का १४ वर्षपछि रद्द गरिएको छ । हुलाकी राजमार्गअन्तर्गत पर्ने यो महत्वपूर्ण पुल २०६८ सालदेखि अलपत्र थियो ।
योजना कार्यालय इटहरीले निर्माणका लागि जिम्मेवारी पाएका पप्पु – महादेवखिम्ती संयुक्त उपक्रम (जेभी) को ठेक्का सार्वजनिक खरिद ऐनअनुसार बिहीबार रद्द गरिएको सार्वजनिक सूचना जारी गरेको छ । निर्माण व्यवसायीले दिएको स्पष्टीकरण चित्तबुझ्दो नदेखिएको कारण ठेक्का रद्द गरिएको कार्यालय प्रमुख युवराज पोखरेलले बताए ।
पुल निर्माण २०७२ जेठभित्र सम्पन्न गर्ने सम्झौता भए पनि पाँचपटक म्याद थप्दा पनि मात्र ५६% प्रगति भएको छ । कुल ३४ करोड ९ लाख रुपैयाँ लागत रहेको परियोजनामा व्यवसायीको १ करोड ७१ लाख रुपैयाँ जफत हुनेछ । यसअघि भौतिक पूर्वाधार तथा यातायातमन्त्री कुलमान घिसिङले कन्काई पुल स्थल निरीक्षण गर्दै “ठेक्का लिएर काम नगर्ने प्रवृत्ति अन्त्य गर्नुपर्छ” भन्दै रुग्ण ठेक्का तोड्न निर्देशन दिएका थिए ।
पुलका १९ स्पानमध्ये ८ पूरा, २ मा गर्डर हालिएको, ६ मा जग खनिएको र ३ स्पानको जग हाल्न बाँकी रहेको छ । पुल नबन्दा स्थानीयले अझै पनि जोखिमपूर्ण बाँसको अस्थायी पुल प्रयोग गर्न बाध्य छन् ।
