- १९ असार २०८३, शुक्रबार / Jul 3, 2026
काठमाडौं, १९ असार । मनसुन सक्रिय भएसँगै विपद्को जोखिम बढेपछि कान्ति लोकपथमा रातिको समयमा सवारीसाधन सञ्चालनमा पूर्ण प्रतिबन्ध लगाइएको छ।
जिल्ला प्रशासन कार्यालय ललितपुरका अनुसार कान्ति लोकपथ हुँदै मकवानपुर–सिन्धुली आवतजावत गर्ने सार्वजनिक, निजी तथा यात्रुवाहक सवारीसाधन अर्को सूचना जारी नभएसम्म हरेक दिन बेलुका ५ बजेदेखि बिहान ५ बजेसम्म सञ्चालन गर्न नपाइने व्यवस्था लागू गरिएको हो।
ललितपुरका सहायक प्रमुख जिल्ला अधिकारी सुप्रभा ढुंगेल खनालले वर्षायाममा पहिरो जाने, ढुङ्गा खस्ने तथा सडक अवरुद्ध हुने सम्भावना उच्च रहने भएकाले यात्रु र सवारीसाधनको सुरक्षालाई मध्यनजर गर्दै यस्तो निर्णय गरिएको जानकारी दिइन्।
उनका अनुसार विगतका वर्षहरूमा पनि वर्षायामका बेला कान्ति लोकपथमा प्राकृतिक विपद्का कारण जनधनको क्षति हुने घटना दोहोरिएकाले यस वर्ष पनि जोखिम न्यूनीकरणका लागि रातिको आवागमनमा रोक लगाइएको हो।
राजमार्गमा हुन सक्ने मानवीय तथा भौतिक क्षति कम गर्ने उद्देश्यले ललितपुर, मकवानपुर र सिन्धुलीका जिल्ला प्रशासन कार्यालयबीच समन्वय गरी यो निर्णय कार्यान्वयनमा ल्याइएको प्रशासनले जनाएको छ।
प्रशासनले वर्षायाममा अत्यावश्यक बाहेकका यात्रा सावधानीपूर्वक गर्न, मौसम र सडकको अवस्थाबारे जानकारी लिएर मात्रै यात्रा तय गर्न तथा जारी निर्देशनको पालना गर्न सबै सवारी चालक र यात्रुलाई आग्रह गरेको छ।
