- २२ भाद्र २०८३, सोमबार / Sep 7, 2026
काठमाडौँ, ११ असाेज । काठमाडौं उपत्यकाबाट दशैँका लागि घर फर्किने यात्रुको संख्या बढेको छ। काठमाडौं उपत्यका ट्राफिक प्रहरी कार्यालयका अनुसार पछिल्लो २४ घण्टामा ५६ हजार यात्रु उपत्यका छाडेका छन्।
राजमार्गमा रहेको अवरोध हटेपछि यात्रा केही सहज बनेको छ। उपत्यका ट्राफिक प्रवक्ता प्रहरी उपरीक्षक दीपक गिरीका अनुसार असोज १ गतेयता चार लाख १० हजार ९९४ जनाले उपत्यका छाडेका छन्। यस अवधिमा ६५ हजार ३९९ सवारी साधन बाहिरिएका छन्। त्यसैगरी, तीन लाख ६ हजार ९३७ सवारी र तीन लाख ६०२ जना उपत्यका भित्रिएका छन्।
हाल काठमाडौं उपत्यकासँग जोडिएका सबै सडकमा सवारीसाधनको चाप बढेको छ। उपत्यकाको कलंकी, बल्खु, जडीबुटी, जगाती, चाबहिल, नयाँ बसपार्क, बालाजु, माछापोखरीलगायत स्थानमा घर फर्किने यात्रुको बाक्लो उपस्थिति देखिएको छ। ट्राफिक प्रहरीले बसपार्कसहितका क्षेत्रमा सहायता कक्ष राखेको छ।
विमानस्थलमा पनि आन्तरिक र अन्तर्राष्ट्रिय दुबै टर्मिनलमा घर फर्कने यात्रुहरुको घुइँचो देखिएको छ। ट्राफिक प्रहरीले यात्रुहरुलाई सुरक्षीत र सहज रूपमा गन्तव्यसम्म पुग्न सहयोग गरिरहेको छ।दशैँको समयमा उपत्यका छाड्ने यात्रुको संख्या १५ लाखभन्दा बढी हुने अनुमान गरिएको छ।
