- २२ श्रावण २०८३, शुक्रबार / Aug 7, 2026
काठमाडौँ, ३ पुस । नेकपा एमालेको अध्यक्ष पदमा केपी शर्मा ओलीले लगातार तेस्रो कार्यकाल (‘ह्याट्रिक’) पूरा गरेका छन्।
भृकुटीमण्डपमा बिहीबार सम्पन्न पार्टीको ११औँ महाधिवेशनको अन्तिम मतपरिणाम सार्वजनिक भएसँगै ओली अध्यक्षमा निर्वाचित भएका हुन्।
मतपरिणामअनुसार ओलीले १ हजार ६६३ मत प्राप्त गर्दा उनका एकमात्र प्रतिस्पर्धी ईश्वर पोखरेलले ५६४ मत प्राप्त गरेका छन्। यसअघि २०७१ सालदेखि निरन्तर पार्टी अध्यक्ष रहेका ओलीले यसपटक पनि स्पष्ट मतान्तरका साथ नेतृत्वमा आफ्नो पकड कायम राखेका छन्।
ओलीले २०७१ सालमा सम्पन्न नवौँ महाधिवेशनमा तत्कालीन महासचिव माधवकुमार नेपाललाई झिनो मतान्तरले पराजित गर्दै पहिलोपटक अध्यक्षको जिम्मेवारी सम्हालेका थिए। त्यसपछि २०७८ सालमा चितवनको सौराहामा भएको १०औँ महाधिवेशनमा डा. भीम रावललाई पराजित गर्दै दोस्रोपटक अध्यक्ष बनेका थिए।
तेस्रोपटक अध्यक्षमा निर्वाचित भएसँगै एमालेभित्र ओलीको नेतृत्व थप सुदृढ बनेको छ। आगामी दिनमा पार्टी एकता, संगठन सुदृढीकरण तथा राष्ट्रिय राजनीतिमा निर्णायक भूमिका खेल्नु ओलीका मुख्य चुनौतीका रूपमा देखिएका छन्।
