- १० असार २०८३, बुधबार / Jun 24, 2026
एजेन्सी, ३ पुस । रुसका राष्ट्रपति भ्लादिमिर पुटिनले आफ्ना शर्तअनुसार युक्रेनसँगको शान्ति वार्ता अघि नबढे रुसले युक्रेनमा आफ्नो नियन्त्रणमा रहेको क्षेत्रलाई थप विस्तार गर्ने चेतावनी दिएका छन्।
वरिष्ठ सैन्य कमान्डरहरूको वार्षिक बैठकलाई सम्बोधन गर्दै पुटिनले कूटनीतिक प्रयास असफल भएमा सैन्य शक्तिको प्रयोगमार्फत लक्ष्य हासिल गर्ने संकेत दिएको अलजजिराले उल्लेख गरेको छ।
पुटिनका अनुसार रुस संघर्षलाई वार्तामार्फत समाधान गर्न चाहन्छ र युद्धका मूल कारणहरूको अन्त्यका लागि तयार छ।
तर, विपक्षी पक्ष र उसका विदेशी समर्थकहरूले गम्भीर संवाद अस्वीकार गरेमा रुसले सैन्य कारबाहीको बाटो अपनाउने स्पष्ट चेतावनी दिएका छन्।
युक्रेनले युद्ध अन्त्य गर्न अन्तर्राष्ट्रिय स्तरमा कूटनीतिक प्रयास तीव्र बनाइरहेको दाबी गरिरहेका बेला पुटिनको यो अभिव्यक्ति आएको हो।
यसैबीच, अमेरिकी राष्ट्रपति डोनाल्ड ट्रम्पले हालै भएका उच्चस्तरीय बैठकहरूपछि शान्ति सम्झौता पहिलेभन्दा नजिक पुगेको बताएका थिए।
हाल अमेरिका, युक्रेन र युरोपेली देशहरूबीच सुरक्षा ग्यारेन्टी तथा सीमासम्बन्धी विषयमा वार्ता भइरहेको छ। तर, नेटो सदस्यता जस्ता संवेदनशील मुद्दामा अझै सहमति बन्न सकेको छैन।
