लमहीमा यात्रुबाहक बस पुलबाट खस्दा २२ घाइते

दाङ, लमही । दाङको लमहीमा यात्रुबाहक बस दुर्घटना हुँदा २२ जना घाइते भएका छन्। पूर्व–पश्चिम राजमार्गअन्तर्गत लमही नगरपालिका–१ कौडियास्थित पुलबाट डडेल्धुराबाट काठमाडौँतर्फ आउँदै गरेको ना ८ ख ७४५५ नम्बरको बस आज बिहान करिब ३ बजे खोलामा खसेको हो।

वडा प्रहरी कार्यालय लमहीका प्रहरी निरीक्षक रोशनराज पाण्डेयका अनुसार घाइतेहरुको लमही अस्पतालमा उपचार भइरहेको छ। तीमध्ये दुईजनाको स्वास्थ्य अवस्था गम्भीर देखिएको र उनीहरूलाई थप उपचारका लागि बाहिर रिफर गर्ने तयारी भइरहेको छ।

बसमा ३८ जना सवार रहेको खुलेको छ। प्रारम्भिक बयानअनुसार बस चालकले पट्टा (शक) भाँचिएर दुर्घटना भएको बताएका छन्। घटनाबारे विस्तृत अनुसन्धान जारी रहेको प्रहरीले जनाएको छ।