- २६ असार २०८३, शुक्रबार / Jul 10, 2026
काठमाडौँ, ८ पुस । राष्ट्रिय स्वतन्त्र पार्टी (रास्वपा)का सभापति रवि लामिछाने र काठमाडौँ महानगरपालिकाका मेयर बालेन शाहबीच भेटवार्ता भएको छ।
काठमाडौँको कमलपोखरीस्थित रास्वपाका केन्द्रीय सदस्य असिम शाहको निवासमा उनीहरूबीच छलफल भएको हो। गएराति अबेरसम्म करिब ६ घण्टा चलेको छलफल चुनावी तालमेलसहित सहकार्यका विषयमा केन्द्रित रहेको बताइएको छ।
आउँदो निर्वाचनअघि वैकल्पिक राजनीतिक शक्तिहरूलाई एकै ठाउँमा ल्याउने उद्देश्यसहित लामिछाने र शाहबीच छलफल अघि बढेको जनाइएको छ। छलफलपछि दुवै नेता एउटै गाडीमा बिदा भएको भन्दै असिम शाहले सामाजिक सञ्जाल फेसबुकमार्फत ‘अन्ततः कथाको सुखद सुरुवात भएको’ उल्लेख गर्नुभएको छ।
रुपन्देहीको बुटवलस्थित सुप्रिम सहकारीको बचत अपचलन मुद्दामा थुनामा रहेका लामिछाने अदालतको आदेशपछि रिहा भएलगत्तै राजनीतिक भेटघाट र छलफललाई तीव्र बनाउँदै आएका छन्। पछिल्लो समय दुई नेताबीच भएको छलफलको विस्तृत प्रगतिबारे छिट्टै सार्वजनिक गरिने रास्वपाका नेताहरूले बताएका छन्।
यसअघि रास्वपा सभापति लामिछानेले आइतवार प्रधानमन्त्री सुशीला कार्कीसँग भेटवार्ता गर्नुभएको थियो। साथै उहाँले ऊर्जामन्त्री कुलमान घिसिङसँग पनि भेटेर छलफल गर्ने तयारी गर्नुभएको बताइएको छ।
